مين يقول أسف لمين

مين يقول أسف لمين

اللي ياما دَوَّخونا
وزَحلقونا بميت صابونَه
وشَقلِبونا وبَهدِلونا
وسَحَلونا ودَحرَجونا
و ع السُّجون جَرجَرونا
وجَلدونا وكَربَكونا
وعَذِّبونا وكَمِّمونا
وجَنب الحيطَه كَوِّمونا

مين يقول أسف لمين
أحنا اللي جوعنا
وشربنا دموعنا
واتسلسِلنا واتلجِمنا

واتألِمنا ولا اكلِمنا
واستحمِلنا واستَسلِمنا
ومين اللي حيسمعنا
ووَجَعنا مِنَّا فينا

مين يقول أسف لمين
اللي ياما
ضِحكوا علينا وعشِّمونا
وفي حبال الهوي
شَعلَقونا وشَعبَطونا
ووَعَدونا بالمَعونَه
وجَوَّعونا ما أكَّلونا
وعَلِّمونا ما فَهِّمونا
وكَلِّمونا ولا سِمعونا

مين يقول أسف لمين
ودموعنا وجروحنا
عايشَه في أفراحنا
مِسانا وصَبَحنا
حزينَه لَيالينا وأيامنا
ورضينا بذُلِنا كُلِّنا
وارتَحنا بأوهامنا
مَلعونَه ضِحكِة أيامنا
مَسجونَه حتي في أحلامنا

مين يقول أسف لمين
أحنا اللي شِقينا وتْعِبنا
ولا يوم ارتحنا
وغيرنا خدوا منا

طُموحنا وأمالنا
وشَقانا وتَعَبنا
خدوا حتي رَبيعنا
واشتَريناهم ولا بعنا
وادينا لا هونّا عَليهُم
ولا قولنا اشمِعنا
مين يقول أسف لمين

أمجد حسني رياض