يا مارينا

موضوع: يا مارينا الأربعاء أكتوبر 21, 2009 7:49 am

يا مـارينـا

أدينا جينا يا مارينا
مادين إدينا شحاتين
الجوع غَلَبنا
بِدموع عِنينا طَمعانين
لِلُقمَه حاف
مِن كُروش الشَّبعانين
في سْنين عِجاف
ومين يُحوش الظًَّالمين
ما العَدل وِالأنصاف
بَقوا صَنفين
ناس تصقَّف للتَعابين
وتْصيِّف عالصَّفّين

وناس تِحلِف
ما شافوا الْلَحْمَه من سنتين

أدينا جينا يا مارينا
الخير مالينا حتي واحنا
مِش لاقيين
مَكتوب عَلينا نعيش يومين
حَزينَه قْلوبنا
مَهموم فَرَحْنا شَقيانين
وَلا يوم شَكينا وَلا يوم بَكينا
وكإن روحنا مَطرَح ما روحنا
ولاَّ جينا هيَّه هيَّه
متلهيَّه فينا ونقول لِمين

عاللي نابْنا واللي صابنا
وَلا يوم لِعِبنا ولاَّ يوم صِعِبنا
عاللي نَهَبنا
وهُمّا هُمّا مِن سنين

وِشْقينا وِتْعِبنا
وَلا يوم لَقينا
وَلا يوم فِرِحنا
وَلا يوم بَقينا مِرتاحين
واللي فينَا مْكَفّينا
وِاحْنا أحنا زي ما احنا
الهَمِ مْحَنّينا
وِكإنه عيبنا
ونقول آمين
أمجد حسني رياض