بلدنا تركة قسموها

بلدنا تركه قسموها

بَلَدنا تِركَه قَسِّموها
عليَ بَعضُهُم وَزَّعوها
تِقولشِ شِركَة أمِموها
وعَمِّمونا وخَصخَصوها
ولجيوبهم وردوها
بُنوك مَصانِع فَلِّسوها
كِنيسَة جامِع فَرَّقوها
وِالحَق ضايع
بين عِصابَة بينهَبوها
بَلَدنا تِركَة قَسِّموها
عَ الظُّلم وَحدُه أسِّسوها
بِالرِّبا كَبَّروها و ظَبَّطوها
وِسَتِّفوها ورَستَقوها

وِالكُل طامِع فِالغَلابَه
وِالدِّيابَة بينهَشوها
وِالغُربَه فيها
العيشَة مُرَّه
يَلعن أبوها
بَلَدنَا تِركَه قَسِّموها
والرَّشاوي عَمِّموها
و كَرَّموها

وِالأتاوي سَبِّبوها
وِالبَكاوي كَوِّموها
وعليَ بَرَّه سَرَّبوها
لاجل ما يجي يوم
وِيِصرِفوها

بَلَدنا تِركَة قَسِّموها
بِالضَّرايب جَمَّعوها
مِن شَقانا ومِن دِمانا وحَلِّلوها
وِالمَصايب فوق دِماغنا تَلتِلوها
بِحكومَة ناكرَة خيرنا
فاكرَة غيرنا حَينصِفوها
وان ولادي بُكرَه حَيسيبوها

بَلَدنا تِركَة قَسِّموها
علي الحبايب فرقوها
حالفين بِرَبي ليخرِبوها
وِمِش عَجايب إنُّهُم بيرسِموها
عَشان ولادهُم يورثوها
أمجد حسني رياض