خليك في حالك سياستنا

خَلّيك في حالَك سياسِتنا

خَلّيك في حالَك سياسِتنا
وَلا تِسأل فين حُكومِتنا
حَنبيع فِي هدومَك بِراحِتنا
وِحَتِسمَع وِتطيع كِلمِتنا
مِن خوفَك أسرار حِكمِتنا
فاحسَنلَّك طَبعاً سَلامِتنا
مَتقولش الله يَخرِب بيتنا
طول مَا انتَ في حالَك تِعجِبنا
وِنشيلَك في عنينا
ونلِمَّك حَوالينا
وِمُمكِن تِناسِبنا

خَلّيك في حالَك سياسِتنا
بِالطّين مَعجونَة حَلاوِتنا
حَراميَّه وعارفين سِكِّتنا
مالنا ومالَك دا في جيبنا
وِطَوِّل بالَك يا حَبيبنا
مِن يومَك مَخلوق تِحمينا
وِتدوق اِلمُر و تِسعِدنا
حَتفَكَّر تِلاعِبنا وتِغلِبنا
حَنصَفّيك وِنداري جَريمتنا
يا تعيش مَخنوق
بِالعافيَة بِالذّوق
لِِحَد ما تِزهَق وِتسيبنا

خَلّيك في حالَك سياسِتنا
حنهرب علي برة بغلتنا
حَتِعمِل صادِق وِتقولّي مَبادِئ
حَتحِس بْخُطورِتنا
حتقولي حلال وحرام
خلال أيام
حتشرف في معتقلاتنا
وتشوف الويل وتنام بالليل
تحلم بغولتنا
حتعمل فيها فتوة حتتنا
حنوريك ونعَرّيك ونخلّيك
تِندم وتِحلف بِحَياتنا
يا ندوسك بفلوسك
وحترجع وتبوس جزمتنا

فَلابُدِ تنافِق
وِكَمان تِتسابِق
وِتِمدَح شَطارِتنا

خليك في حالك سياستنا
وبلاش تراجع حساباتنا
وتقلب في مواجع
وتهاجم وندافع
وتضَّيع صحتنا
ولا تضرب بوز لأنك أراجوز
ودموعك فرحتنا
ولا تِشغِل بالك بِحالِتنا
ملعونة الدنيا اللي سابتنا
نشكي ونلعن في خيبتنا

خليك في حالك سياستنا
ولازم تصدَّق خُرافاَتنا
وتبصم علي كل ملفاتنا

والعمر ان عدي و فاتنا
أو حتي حتتمني وَفاتنا
حنعيش وتحصل أمواتنا
أمجد حسني رياض