أنا لو فيل كنت ارتحت

أنا لو فيل كنت ارتحت
أنا حاسِس
إنِّي بَقيت هِندي
والدُّنيا بِتاخُدني
مِن تَحت لتَحت
مِن كُتر اللي باشوفُه فْي بَلَدي
مِن يوم ما وْعيت
عالدُّنيا وفَتَّحت
مَصلَحتَك مَفاتِحها فْي إيدي
لَو حَتشَغَّل مُخَّك
وِلجيبَك شَخشَخت
واِتعَلِّم وِاترَبَّي يا وَلَدي
لَحمِ كتافَك مِن أكل اِلسُّحت

واِلمُر دا زادي وزوّادي
شَحّات مِن يومي
مَمَلَكتِش يَخت
مَحَصَّلتِش لَعّيب في النّادي
وَلا تِمثال فَنَّان
شَغَّال في النَّحت
والعيب بَقَي شِئ عادي
وِحاوِلت أجَرَّب ما فَلَحت
خُد مِن عَقلَك واِدّيني
واِستَعجِب
عَلَي ميلة اِلبَخت
واهَلِّل وانادي
واِلنَّاس في وادي
مَهما شاوِرت ولَمَّحت

واطَبطَب واهَنِّن وادادي
مَفيش فايدَه
مَهما شَرَحت
ووَضَّحت
عاقِل مَجنون
خَلِّيك هادي
ورَيَّحني
مَتقولش انا لَبَّخت
إِسلُخني شَفّيني
وبيع جِلدي
دا انا لو فيل
كُنت اِرتَحت
أمجد حسني رياض