أكتب عامي واحرق دمي

أكتِب عامّي

أكتِب عامّي وِاحرَق دَمّي
وِخالتي وخالي كَمان وِعَمّي
خَليني اشيل هَمّين فوق هَمّي
أصلي خَلاص قَطَّعت هدومي
مِاللي بَشوفُه في أمسي ويومي
وِعَمِّنا نِجم يا عَم فاجومي
في الكّوتشينَه زي الكّومي
أمّا الباقي عام عليَ عومي
والله يرحَم ابونا جاهين
أبو وش واحد مش وشين
وِرُباعيّات حِلوين طِعمين
بَس حانِشكي لمين وِلمين
وبيرَم راح مَعَ الرّايحين
وِساب أشعار ورود رَياحين
وِالكُتّاب رايحين جايين
شالوا وحَطّوا عَلينا الطّين
بِكَلام بيقولوا عَليه دَواوين
وِاوزِن كيلو وهات رَطلين
مَا بَحر اِلشِّعر بَقَي موجتين
موجِة حُب اِتنين عاشْقين
وِهوجِة كِدب عَليَ السّامْعين

مِش عارِف حَتاخُدنا لفين
وِلإمتَي حَنعيش خايفين
شاربين الذُّل ومِش عاجبين
مِن كُتّاب عايشين تايهين

حَتَّي المَعنَي مِش فاهمين
واصل اِلكِلمَة مِش عارفين
ما الكُتّاب اِلأصليين
مُعتَقَلين أومَساجين
أوعَالباب واقفين عاطلين
وِلإن الشِّعر بَقََي بيلِم
عَليل مَريض بِفَقر اِلدَّم
وِكُل قََصيدَة هَواها يسِم
تِعَلّي الضَّغط تزَوِّد هَم
تِشَيِّب شَعري بلون اِلغَم
غَطّوني يالا بِالبَطاطين
أو وَدّوني مَعَ المَجانين
لاجل اَرتاح مِن اِلجاهلين
القَيامَة المُدَّعين
أمجد حسني رياض